Biasa den kada dirangi nakua Uai lan busso anna tise’go‘, battuananna konde-kondebang anna den temai apa disipekkai, lan raka tananan dapo’, lan pa’rapuan sia lan kombongan. Kasipekkan susi tomai parallu dipasipolean da’ anna bu’tu tu kasisalan. Na belanna den tu tau natumang kamakarrasanna saelako siparapa’mo lako to ma’paolai salu, lako raka to ma’parenta, lako raka ada’ lanlu tondok. Den duka papasan kakinaan kumua iake siparapa’moki’ lako to ma’paolai salu, indemoto tu biasa dinai sitauan, battuananna dipalosongmo tu apa disipekkai anna ia tu kasiulangan, lan raka tananan dapo’, lan raka kasiumpuran rara buku ba’tu lan kombongan.

Ma’pakilala tu Rasulu’ Paulus lako to Korintus kumua ia ke denni tu apa disipekkai lanlu kombongan melo ke dibukai lanni kombongan, da’ anna den siparapa’. Parallu dipessalai tu ussorong kara-kara lako to ma’paolai salu lan kaparentan, belanna Iatu dianga’ lan pangra’tasan kara-kara iamotu kamaloloan, na umba lanakua bu’tu tu karatasan umpenggarontoi’ kamaloloan ke iatu to ma’paolai salu to tang ma’patongan? senga’mito, iatu atoran napellesei tu pa’paolaian salu lan kaparentan iamotu sukaran lino tangia sukaran umpa’budai kasiuluran situru’ katonganan-Na Puang Matua. “Apa pada to siulu'komi ammi lao siparapa', ontong pissanpi tu lu lakokomi to tang ma'patongan” (ay.6).

Siparapa’ sia umpopera’ta’ kara-kara lako pa’paolaian salu salian diomai kapatonganan inangla umpabu’tu kasisalan kapua sia iamo la umpoka kasiumpuran rara buku sia kasiulangan lan kombongan. Iamoto sipatu dibukai melo temai kasipekkan situru’ kakinaan sia kamaloloan-Na Puang anna urungan umpabu’tu kasialamasean. Kamaloloan-Na Puang iamo mebaa lako karapasan sia kamarampasan. Amin.