Ma’din denmo to sarani ma’tangnga’ kumua: na takua tarru’ masaimo te pangngallu’ diona kasaean-Na Kristus sule. Tangdipokadapi kedipasiumpu’mi temai a’gan dadi tu buda bangmo merussa’i lan pa’kamayan sia kapessa’bian diona parenta-Na Puang.

Kadan-Na Puang tu ta nannung unnada’iki’ diona kapatonganan untayan kasaean-Na Kristus sule. Bunga’na, ‘sangallo Nasanga Puang pada bangsia sangsa’bu taunna, sia sangsa’bu taunna pada bangsia sangallo’ (ay.8). Ia tekadan-Na umpamaleso diona a'gan massae lako. Sia la umpamalesoi kumua inang tae’ ta palambi’ la unrekenni tu attu massae lako. Ma’penduanna, tae’ra namarempa tu Puang umpalanda’ pangallu’-Na (ay.9, 10) sangadinna nanai payan kumua ia tu pa’kaboro’-Na umben attu mintu’ tau anna mengkatoba’. Apa maleso duka kumua ia tu kamalillinan lan lino sia to manoka mengkatoba’ la sumpu sumandakna. Ma’pentallunna, Ia tu kuasa kamalillinan la diukung, iamoto la tuoki’ lan kamaseroan situru’ kadan-Na su’ding den siapi attu. Ma’penna’pa’na, latapake melo te attu umpessa’bianni tu pa’kaboro’-Na Puang sia attu Napa’kamasean ladinai tontong mengkatoba’.

Attu tu dinai untayan kasaean-Na Kristus sule da‘ anta ranggang. Tae’ra Namarempa tu kasaeanna Kristus, sangadinna belanna Napakaboro’ te lino. Untayan kasaean-Na Kristus tangia diona ussuka‘ sia urreken attu, sangadinna diona kamanassan kumua disearan tu arrang pa’kaboro’-Na lako te lino. Tae’ra anna tang unningaranni Kristus tu kasaean-Na sule, sangadinna diona mintu’ penaa makarra’ anna dibenpa attu kumua denna upa’ anna mengkatoba’. Amin.