Renungan Harian Toraya - ReHaT
Senin, 5 Agustus 2024
PA’KALEAN BA’RU
(Manusia baru)
Efesus 4:17-24
Iake denni te mai apa ba’ru, tantu la’bi nakalo’ penaanta umpakei na iatu malusanna. Na lesang Paulus kumua iatu to mengkaola sia to mengkatoba’ lan Pa’panundu‘na Penaa Masallo umpokale a’gan pa’kalean ba’ru. Ma’ondonganna napamati’tin tongan Paulus kumua inang tae’mo nama’din la umpokalepa sia la umpotamangkalepa a’gan dolo tu to unnakumo Kristus mendadi Puang sia Jurusalama’. Tenmito kumua iatu to umpatonganmo Kristus inang torro senga’mo a’ganna na iatemai to tang ma’patonganpa lako Kristus. Tae’mo tama’din tuo lan kamailuan diona a’gan lino. Belanna tuo lanmo Kristus, dila’bakmo, sia dipamaseromo ullendu’i kamaparrisan, kamatean sia kamalimbangunan-Na Kristus. Iamoto iatu to ma’patongan sipatu tuo lan pa’poraian-Na Puang.
Lako kita to naluangmo kasipulungan kombongan sallo’, tae’mo anna den la nenne’ sikadamak tu penggauran lan kamalillinan belanna iamo umpamalusai sule tu a’gan ba’ru mangkamo Nakamaseanki’ Puang. To lumingkamoki’ lan arrang MaindandanNa Puang, tangiamoki’ to katurak-turak lumingka lan kamalillinan. Apa nenne’bangpa den pebali ke tilende’ki’ dikua na lan piki’ lino sia to lino piki’. Inang denbang attunna anna den tilende’ apa tae’ anna la den mellendokan diomai katilenderan iato kumua na tolinoki’ sia lan piki’ lino, sangadinna ia tu ladiangkaran iamotu sule ma’sossoran renge’ dio olona Puang Matua.
La takanandai tongan te katuoanta, kumua to dila’bak sia to dipamaseromiki’ lan Kristus. Paralluki’ tontong umpokale a’gan pa’kalean ba’ru ullendui‘ kamengkaolan tongan sia tangungkarera kapengkatobaran. Penaa Masallo‘ iamo tontong la urrendenki‘ ullolangi te katuoan kumua anna den tontong batta‘ umpamanassai tu a’gan kadiba’ruanta lan Kristus ullendui buangan kada sia penggauranta. Amin.
