RENUNGAN HARIAN TORAYA (REHAT)
Senin, 1 September 2025
KILALAI TU PANGLALANMU
(Ingatlah akan pemimpin-pemimpinmu)
------- Ibrani 13:7-21 -------
Den pira-pira tu dikuanna ussa’bu’i lan basa To Raya tu “Pemimpin”. Den tu dikua Pangulu, to manglopian, to untoe kuasa, arung, panglalan, to ma’panundu’, to Ma’parenta. Matumbai anna sisengaran sa’buranna, belanna dipasiumpu’ tu toean sia passanan tengko dio kalena si misa’-misa’ tau. Lan te pa’basanta, ia tu “pemimpin” disa’bu’ panglalan belanna umpatu to ma’pana’ta’ diona kapa’panunduran lako kapatonganan. Lan (aya’ 7) nakua “Kilalai tu mai panglalanmi tu to mangkamo umpokadangkomi kadanNa Puang Matua, palan ara'i tu tampak katuoanna, ammi alai sangka' tu kapatongananna”.
Panglalan tu disanga lan pa’basanta tu sipatu dikilalai iamotu to mangka umpanundu’ki’ Sukaran Aluk-Na Puang Matua. Iamo mangka ullalananki’ sia unnadai’ki’ kadan-Na Puang. Napamaleso Paulus kumua ia tu pangadaran diona Puang Yesu tu naadaranki’ tomai panglalanta tonna dolona, ia bangsia tu Puang Yesu dipenombai totemo, tae’ra anna membali len. “Iatu Yesu Kristus tae' anna membali, la iongi', la totemo sia sae lakona” (8), iamoto na pakaintinni Rasulu’ Paulus kumua ladikareai tomai ma’rupa-rupa pangadaran. Lan aya’ 9 nakua “Da napapusakomi ma'rupa-rupa pangadaran makalaen-laen.
Panglalan tu sipatu dikilalai sia dipa’tuladanni iamotu to mangka umpa’pangadaran katonganan-Na Puang Matua sia tongan-tongan ma’panundu’ lako kameloan, ullendui’ buangan kadanna sia penggauranna. Buda tu panglalan manarangbangri umpoka pangadaran, apa tangsioloanan tengka ke’de’na. Panglalan tongan iamo tu to ma’panundu’ tongan lako katonganan-Na Puang sia pato’ dipa’tuladanni tu penggauranna. Iamoto …”la unturu'komi sangka'na tu mai to umpomana' mintu' tu Naallu'na Puang Matua belanna kapatongananna sia kama'tanan penaanna. (Ib.6:9). Amin
Sumber : Buku Renungan Harian Toraya (REHAT)
Diterbitkan oleh Badan Pekerja Sinode (BPS) Gereja Toraja.
