Den tu kada to kinaa “iake tongan pokadai tongan, iake tae’ pokada tae’”. Misa’ kada pepasan lako mintu’ tau la umpokada tu katonganan situru’ kamalamburan. Dikua da’ na den tau umpokada tu kada tang tongan. Iake manaman tu katuoan, tang magasa umpokada tu katonganan. Apa iake untingayo kara-kara katuoan magasa sia la mesangganggi manassa masussa tu umpokada katonganan.

Pa napapayan nenne’ ia rasulu’ Paulus lan katuoanna tu katonganan. Moiraka marassan dio olona kombonganna Fesus sola Agripa. Narappo’ tu mai pengulu to mina sia to kapuanna to Yahudi  tu rasulu’ Paulus. Iamoto nasolan Festus tu to buda morai untarungku Paulus. Ada dio tingayona Festus sola datu Agripa, napokada Paulus tu mintu’ katonganan diona Yesu Kristus. Tang ma’parondo sia moro’ tu Paulus umpokada tu mintu’ katonganan. Natentenanmi Paulus lako datu Agripa sisola mintu to sae lan kombongan randuk tipamulanna umpakario-rio to ma’patongan sae lako napatongan. Ullendu’i panganta’na Penaa Masallo ma’din batta tu Paulus umpokada tu katonganan moi raka natandai kumua nangla dipatama pa’tarungkuan, sia nata’tan Festus sia nakua umbai Katama-taman tu Paulus. Ullendu’i kasa’bianna Paulus dio tingayona Festus sia datu Agripa, randuk napatongan datu Agripa tu kasa’bianna umpokada katonganan  diona Puang Yesu tu mangka malimbangun.

La batta duka siakiraka umpokada tu katonganan moi lan kara-kara katuoan tu la umpamandasaki? Budamo dadi lan katuoan, maringan bangmiki’ tigirik dio mai katonganan ke buda kamasussan. La batta’ki susi Paulus tu umpa’petiroan katonganan lako Puang moi digaratta’, dikada-kadai sia la dipatama pa’tarungkuan. Belanna tapatongan kumua Penaa Masallo’ la urrondongki’ umpokada katonganan. Amin.

Sumber : Buku Renungan Harian Toraya (REHAT)