RENUNGAN HARIAN TORAYA (REHAT)
Senin, 18 Agustus 2025
SUDI!
(Ujilah)
------- 1 Yohanes 4:1-6 -------
Lan te katuoan, buda rupanna tu ulelean sia pangadaran ditarima sia dirangngi. lamote tu parallu maleso kumua manassa tongansiaraka tu mintu'na?, tae'siaraka na kada tang tongan ulelean tang kebattuan sia pangadaran mepapusa? Ma'pakilala kadanna Yohanes kumua da’ mipatongan bangi tu anggenna penaa, sangadinna sudi dolo tu mintu penaa iato. latu patunna pa'pakilalanna Yohanes kumua la disudi tu mintu penaa. belanna den tu penaa tae'na bu'tu dio mai Puang Matua sangadinna dio mai nabi tang tongan tu bu'tu lino. Umba la dikua ussudi tu anggenna penaa anna ditandai kumua lu dio mai Puang Matua? Nakua kadanna Yohanes: iatu penaa unnaku Yesu Kristus saemo lan a'gan tolino, iamoto tu lu dio mai Puang Matua; na umba-umba tu penaa tae' naakui tu Yesu, iamo bu'tu dio mai penaanna uali Kristus.
Ussudi tu mintu penaa, sia mintu' pangadaran parallu dikanannangi lan lingkanna katuoanta belanna iatu dianga' tantu melona, tonganna sia mebaa lako katonganan tangngia lu lako kadakena. Lan 2 Kor. 13:5: Paressa kalenai tu kalemi, ba'tu lan siakomi kapatonganan, ontongpi sudi kalenai tu kalemi ba'tu tae'raka miisanni kumua Narondongkomi Yesu Kristus? Bokoranna ke attangangkomi. Ussudi kale sia iatu mintu apa manassa kapua gai'na lako kaleta, dinii untandai tu torroanta kumua tontong siariki' ka lan katonganan ba'tu marassanmniki' tuo lan kasalan, tontongsiariki'ka mengkaola lako Puang Matua ba'tu marassanmiki' umboko'i Puang Matua, tontongsiariki'ka umpatongan Puang Yesu ba tu tae Slaraka ta marassanmo unturu' penaanna uali KristuS? Sudimi tu mintu'na situru pangadaran kadan-Na Puang anna kuasan-Na la umpatandaianki' umba tu situru' pa'poraian-Na, Amin.
Sumber : Buku Renungan Harian Toraya (REHAT)
Diterbitkan oleh Badan Pekerja Sinode (BPS) Gereja Toraja.
