Biasa dirangi tu pa‘pakilala kumua iake tuo piki‘ lan te lino inangla budabang tu a’gan sisonda situka’ ditingayoi sia urrampoiki’. Buda tomai apa dipogau’ sia dikarang belanna buda duka tu naanga‘ penaanta dikua kenna diampui. Apa iatu nenne’ dadi, iatu dianga’na, tangsusi tu dadinna lako kaleta, saelako biasaoki‘ ka’tu rannu sia mo’dong penaa naurunganni kondo’moki’ tu la mengkarang. Apa pole’ raka ke iamo butung mandu losong dadi lan katuoanta tu kamaparrisan, biasami bu’tu pa’pasikapangkapang lan tanga’ta kumua umbai tae’mo ia gai’ta tu ma’patongan lako Puang, belanna senga’ tu dianga’ anna senga’bang tu dadi sia urrampoiki‘.

Ma’din mangaki‘ ke ditanga’ kondi’ te kada napokada Rasulu’ Yakobus lan te pa’basan tu nakua “E sangsiulurangku, iammi tobang tama ma'rupa-rupa peroso, sanga bangmi kaparannuan kapua tu iannato; belanna mitandai, kumua iatu kadisudianna kapatonganammi umpabu'tu kabantangan.” (ay.2-3). Bu’tu pekutana kumua umba ladikua ussangai kamauparan tu peroso urrampoiki’?. Maka raka ladikulle umpatananni tu kamaparrisan? 

Manassa inangla tontong dadi sia ditingayoi tu ma’rupa-rupa Peroso sia kamaparrisan, iamoto anna ma’pakilala Rasulu’ Yakobus kumua sipatu diampui tu kapatonganan, belanna kapatongananri iamo la umpabatta’ki’ sia umpapataloki’ untingayoi tomai ma’ruparupa peroso. Kapatonganan iamo tanda manassana kumua to ma’sattuananki’ lako Puang Matua. Sipatuki’ tontong umpalaku kakinaan lako kale-Na belanna Iamo oto’na kakinaan tongan. Tae’ anna la ma’ranga’-ranga’ tu kapatongananta sangadinna la parrukki’ sia tumanan massattuan lako Puang kumua Iamo oto’na katuoan sia katilendokan. Amin.