RENUNGAN HARIAN TORAYA (REHAT)
Senin, 5 Mei 2025
PUANGMO OTO’NA PA’TUNDUAN
(Tuhanlah Penolong)
Mazmur 121:1-8
Iatu tuo lan telino buda tu a’gan merampoi. Mintu’ tau tantu ia nasang naanga’ tu melona sia dipomarampa’na. Na belanna melona manna tu dianga’, iamoto anna ia ke tangmelonami tu bu’tu sia merampoi nenne’ moki’ ma’kapussakan yaraka na denmo ka’tu rannu.
Ullendui’ te Pa’pudian dibasa, maleso tu nakuanna to Ma’pudi untingayoi tu a’gan mabanda’ urrampoi katuoanna. Tae’ anna sosso’ kapatongananna to Ma’pudi belan nanasanda tonganni kumua Puang Matua iamo oto’na pa’tunduan. Iamo to na ma’kada kumua, Iatu pa’tunduanna la bu’tu lu dio mai Puang Matua tu umpadadi langi’ sola lino (ay.2). Iamo Puang pasareonganna to Israel, tu tae’anNa tikkaru’du’ ba’tu leppeng (ay.4). Iamo Puang tu la tontong untoyanganni diomai kasanggangan sia la la urrinding pala’ deatanna (ay.6) Sia la ungkampai lan mintu’ torro ke’de’na tempon diomai landa’ sae lakona (ay.8).
Sipatu diala dandanan sangka’ umba susi kabantangan rannunna to ma’pudi ma’sattuan lako Puang. Nasanda tonganni lan kapatongananna kumua Puangmo la urrande pala’ deatanna anna tilendok diomai kamasolangan. Iatu to tontong ma’bulolollong tae’ anna la unneloranni Puang tu lentekna la tilende’. Tae’ anna bela tikarru’du’ sia leppeng (4) tu Puang sangadinna tontong na pemantang tu mintu’ langnganlaoanna kalingkanna taun-Na. Moi anna mapirrik mela’da’ tu allo sia moi anna pi’tuk tu malillin tae’ annala mepatumba len (6) belanna Puang To pasareoangan tontong mekulambu taruno sia unnala maseki’. Iamoto tae’ antala sepang lako kapenomban senga’ sia ma’rannuan lako tu apa disanga mala’bi’ do te lino. KuasanNa Puang iamo undaoanni mintu’ kuasa sia kamala’biran dao te lino, sia Ia tu kamatandeanNa tangtileluk sae lakona. Amin.
