Mintu’ tolino nang na kamali’ tu kamanaman sia kameloan dadi lan katuoanna. Belanna iake manaman tu katuoanna, tantu umpabu’tu kamasannangan sia karapasan lan lu pa’rapuan, tondok, ba’tu kombongan. Iamoto anna parallu tu sipassambayangan, siangkaran, sia sipamatoto’, dikua anna manaman tu katuoan sia bu’tu tu karapasan. Da’na den susi kombongan dio Laodikia, belanna manamanmo katuoanna, iamoto na pabali-balimo lako Puang, umpogau’mo penggauran tang melo. Dadi, iatu kamanamanan katuoan, sitonganna tae na mendadi sukaran kumua iamo katuoan Naanga’ Puang to. 
Parallu dinannung kumua, iatu kamanamanan katuoan ladipake melo sia diangkaran umpakala’bi’ Puang. Nenne’ dadi lako kombongan, tu belanna makambanmo eananna saelako untangaran misa mo kalena, sia  iatu kamenombanna tae’mo na tu’tun lulako Puang. Soyanan katuoan susito Na tarru’i Puang Yesu kumua sitonganna mandasa tu kombongan, sia tang tiroan tau, sia bongko, sia buta, sia ma’kambelang (17). Battuananna iatu kombongan marassan umbaa katuoanna lako kamatean belanna dosa. Apa moi raka susi to, tontong tu Puang Yesu untayanni sia metamba kumua anta sule umpenotoi tu katongannan-Na. Iamoto lan aya’ 19, nakua Yesu “samami to Kupakaboro’, Kutarru’I sia Kuada’.” Battuananna kumua, ia tu peada’ sia peta’tan-Na Puang Yesu iamo tanda pa’kaboro’-Na lako Kombongan. 
Buda tu apa napake Puang Unttaru’ sia Unnada’ tolino, ma’din dipotumangi’ sia dipomapa’di’, apa moi susi to, patonganni kumua, lan mintu’na to, marassan tu Puang umpamaseroki’ sia unnanga’ tauNa la mengkatoba’. Kilalai te kadanNa Puang, kumua la tontong ki’ umpengkullei tu katonganan sia tuo lan kapengkatobaran. Minda-minda ketalinga, la naperangii tu apa Napokada Penaa lako kalena. Amin