MA‘PASALA

Butung iamo buda tau umposipa’i tu mandu manarang untiro sia umparessa kasalanna to senga’ anna  masussa untiro apapole’ raka launnakui kala’bianna to senga’. Iamotu to susito tu nenne’bang tangrapa’ lan katuoanna belanna sukaran inaannabang napake ussuka’ to senga’ saelako matira’ umpasala tau. Den kada to kinaa nakua “denki’ raka la ganna’bang, inang den nasang tangpalambi’ta sia den dukabangsia kala’bianna tu to senga’. Iamoto anna diala panganderan ke undulluki’ tau kumua misa’ rakka’ta undullu tau apa ia tu rakka’ta a’pa’ undullu kaleta. Iamoto, anna dikua kumua namane den umpasala to senga’ melo ke umparessaki’ kaleta dolo, mbai nakita tu mandu buda kasalanta.

Napa’pakilalan Rasulu’ Paulus lan pa’basanta kumua (1) ...e iko, minda-mindako tu umpasala tau; belanna lan tu kaumpasalammu to senga', iko kalenamo umpakannai ukungan kalemu; belanna iko ma'pasala na iko duka umpogau'i. Susimo dipokada lan Matius 7:1-3 “ Da mipasala tau, da ammi dipasala. Belanna iatu mininna ma'pasala, ia pole' la dinii umpasalakomi, sia iatu sukaran mipassukaran tau, ia duka la  dipassukarangkomi. Ma'apari mukitai tu bulisak lan matanna siulu'mu, apa kayu sangbatang lan matammu tae' musa'dingi?

Ia tu kita to lino tae’ kita lalan ladinai umpakkan tosenga’ sangadinna Puang Matua manna, belanna Puang ia tu untoe pepakkan sia mintu’ki‘ naluang tu pepakkanNa. Puangmo To mangra’ta‘ tang pakayun bimbang lako mintu‘ tau. Iamoto anna Ia tu sipatu ladi pogau’ iamo tu tontong ussassan kaleta belanna dilese didudung tu kasalan. Balo’ tu sipakilala apa tae’ anna kita lasipapakkanan temai kasalan dipogau’. Iamo ia la tontong diparri-parri umba ladikua anna  iate katuoanna tontong umpogau’ kameloan (10) anna rampoiki’ kamarampasan.Amin