RENUNGAN HARIAN TORAYA (REHAT)
Senin, 8 September 2025
MANAPPA’ LAKO PANGALLU’NA
(Yakin terhadap janji-Nya)
------- Yeremia 19:1-15 -------
Nenne’bang dirangi tu pa’pakilala kumua ia tu pangallu’-Na Puang Matua inang tae’ naballe. Sitonganna tontongbang nabuai Puang Matua tu pangallu’na situru’ tiparanta’na attu, kitari torro to lino tanguntandai. Iamoto la tontongki’ manappa’ lako tu kada diallu’ lan Sura’ Madatu kumua iake mukkunbangki’ umpogau kakadakean sia untengkai katonganan-Na manassa ia tu buanna lako kaleta iamotu ukungan, apa ia ke makaritutuki’ lako lalan pa’poraian-Na sia tontong mengkatoba’ diona temai dosa dipogau’, manassa lana pagarri’ki’ na ia tu buanna lako kaleta iamotu kamarampasan sia kasalamaran.
Ia tu to Israel iamo bangsa napilei langsa‘ Puang Matua, ia tu kadipileianna napasituru‘ pangallu‘-Na kumua anna tontong mendadi pentoean manda‘ sia pa‘pakilala landa‘ lako bati‘ siosso’na, kumua ia ke makaritutui mengkaola lako Puang manassa ladipassakke, apa ia ke pabali-bali sia menomba lako kapenomban senga‘ (rapang-rapang dipodeata), manassa ladiparampoi ukungan.
Susimo dipokada lan pa’basan diona kasengkean-Na Puang Matua lako To Israel belanna kamakarrasan penaanna memala‘ lako deata, sia umpogau’ kadake. Nasuami Puang Matua tu Yeremia male unnalli busso na tambai tomai pekaamberan sia pira-pira pangulunna to minaa na solanni rokko misa‘ lombok disanga Ben-Hinom tu inan nanai to Israel memala‘ lako deata. Indeto nanai Yermia umpokadanni tu kasengkean-Na Puang Matua, anna tessei tu busso dio tingayona tau iatu la mendadi tanda kumua la susimoto tu kasengkean-Na Puang matua lako tondok iato sola mintu‘ to torro lan. Iamoto sipatu dikatappai’ tu pangallu‘-Na Puang kumua iake dikaritutui tu parenta-Na manassa lamaupa’ki‘, apa ia ke dibokoi‘ tu parenta-Na inang lanarampoiki‘ ukungan. Amin.
Sumber : Buku Renungan Harian Toraya (REHAT)
Diterbitkan oleh Badan Pekerja Sinode (BPS) Gereja Toraja.
