RENUNGAN HARIAN TORAYA (REHAT)
Senin, 19 Agustus 2024
KAKINAAN LUDIOMAI PUANG MATUA
( Hikmat dari Tuhan )
1 Datu 3:16-28
Untimbang misa‘ kara tangia apa maraa apa pole’ ke tae’i pellesean tadinai unnala kara’tasan. Indemote dinai umparallui tu pa‘timbangan matarru‘ sia tangla pakayun bimbang. Susimo dipatingo lako datu salomo umba lanakua untimbangi sia unnalanni kara’tasan diona kara-karana da’dua indo’ tu ma’popera’ta‘ mindanna tongan tu indo’na tu pia. Tae’bang tau ladipalakui pa’timbangan ba’tu la mendadi sa’bi belanna tae'tau untiroi te apa dadi.
Unnalami kara’tasan tu datu umba lanakua urra’tai‘ te kara-kara. Tangtama akkala’ te lanapogau’na datu mangra’ta‘ belanna apa’parentan kumua anna di piak dua tu pia anna sisangsesei te indo‘ sola dua. Umba susi timbanganna te baine sola dua? Mengkailing tu indo’ misa’ kumua lo’namo anna sisayuran anakna assalan da’na dipatei tu pia, apa ia tu misa’ naporaimo tu passanganna datu kumu anna di pa’dua tu pia (ay.26).
Indemote nanai untandai datu minda sitonganna tu indo’na tende pia belanna tae’misa’ indo’ la unneloran anakna dipatei dio tingayona. Mintu’ to Israel tu urrangi te nakuanna datu urra’ta’ kara ma’kada kumua “ late pangra'ta'na datu narangi mintu’ to Israel, nakabangnga'mi tu datu, belanna natiro Kumua den kamatarrusanNa Puang Matua lan ba'tengna, la ma‘paolai salu” (28)
Manassa kumua ia tu kakinaanNa Puang Matua iamo mepatudu unnala kara’tasan malolo tu mepatoyang diomai pa’poraian to lino. Tangmaraa tu unnala kara’tasan ke tangmanassai pentoeanta. lamoto anna parallu dianga tu kakinaanNa Puang Matua ma’parenta lan penaanta dikua anna lan unnala kara’tasan, Puang la umpatuduki’ da’ anna den tilende’. Amin.
