RENUNGAN HARIAN TORAYA (REHAT)
Senin, 25 Agustus 2025
DIPERANGI ANNA DIPOGAU
(Mendengar dan melakukan)
------- Ibrani 4:1-11 -------
Lan Yakobus 1:25; nakua "Apa ia tu to unnannung atoran Sukaran aluk sundun, tu umpopentorro to makakaki' tae' anna mendadi to ma'perangi tang mengkilala sangadinna to menturu' tongan, maupa' ia tau iato lan kamenturusanna", Tae' gai'na tu umperangi manna kadanNa Puang apa tae' anna dituru' sia dipogau’ Ia tu Kasalamaran dio kaleta tu mangkamo nakamaseanki' Puang lan Puang Yesu sipatu tontong dikarang sia dipopempayan lan penggauran.
Kamengkaolan iamo lamepanundu' ma'palulako tu inan mangkamo napasakka' Puang Matua lako kaleta. Naala panganderan Rasulu' Paulus tu nenek to dolona to Israel kumua ia tonna lan kalingkanna dio padang pangallaran, nenne' tangmengkaola sia unnea Puang Matua napourungi tae' anna tarru’ tama tondok mangka dialluranni. Iamoto anna dipa'pakaintinan lako bati' siosso'na kumua anna kilalai tu iannato sia sipatu napopendadi peladaran. Lan lbrani 3:8 "Da' mipabattukki tu penaammi susi tommi pasaki-arasan, sia tonna allo kapassandakan dio padang pangallaran, tu nanai nenek to dolomi ussandakNa' nasudi...."
la tu pempatuanta iamo tu mempatu lako allo kasaeanna Puang Yesu sule. indemoto ladinai ussundunni tu kasalamaran mangkamo dikamaseanki’. lamoto anna sipatu dipemarangan te kalingkanta lan te katuoan, mangkaki’ mani masalio natumang temai a'gan lino sia tontong tuo lan kamarrasan penaa. Mamasemo tu Puang mangka ullendokanki', kitamora umba ladikua umparakai te pa'kamase kasalamaran mangkamo dikamaseanki'. Sipatuki tu tontong makaritutu umperangi kadanna Puang anna dituru' sia dipengkaolai ondongpi tontong lamempayan lan mintu' soyanan katuoanta, Amin.
Sumber : Buku Renungan Harian Toraya (REHAT)
Diterbitkan oleh Badan Pekerja Sinode (BPS) Gereja Toraja.
