RENUNGAN HARIAN TORAYA (REHAT)
Senin, 31 Maret 2025
DEN IA TU PUANG MATUA
(Tuhan itu ada)
Mazmur 53:1-7
Iatonna mangurapa tu Einstein, misa’ to manarang den na sibali-bali profesorna ba’tu gurunna. Iatu nani sibali-bali iamotu diona Puang Matua. Nakua ma’kada tu profesor : tae’ ia tu Puang Matua, belanna iake denni tu Puang Matua manassa tae’ iatu kakadakean. Namoiraka na den tu disanga Puang Matua manassamo kumua Ia umpadadii tu kakadakean. Apa nakua ia Einstein umbebali: Iake kamu profesor, denraka tu madingin? NakuaProfesor, “Io!” Apa nakua Einstein, “sitonganna tae’ ia tu madingin! Belanna atoranna Fisika iatu disanga madingin kataeranna malassu!”. Napatarru’pa Einstein tu pekutananna, ” Denraka tu malillin profesor?”Nakua Profesor mebali, “Io!” Apa nakuao Einstein, “salakomi Profesor. Tae’ ia tu malilin belanna iatu malillin kataeranna arrang”. Natolepi mekutana tu Einstein ,” denraka tu kakadakean?” Iatonna mekaiotu professor, nakuami Einstein salapokomi profesor!” Iatu kakadakean tae’ ia! Belanna iatu kakadakean bu’tu belanna tae’ ia tu Puang Matua lan penaanna tolino!”Iatu to umpogau’ kakadakean iamo to tae’ umpatonganNi tu Puang, sia tae’ ia inanna Puang Matua lan penaanna sia lan katuoanna.
Lan te lino dinii tuo marassan bangmo bu’tu tu to tang umpatongan diona Puang Matua susi duka tu disura’ lan pa’pudian 53:1-7 Apa nakua ia to ma’pudi kumua iatu apa iato bu’tu diomai to tang kinaa, to sanga kalena to matarru’ , baga sia to umporai kakadakean sia diomai to kadake penaanna.Lako tau iatomai tang ka’tu Puang Matua ma’pakilala kumua anna mengakatoba’ sia mengkilala lako katongananNa Puang Matua. Belanna iake tae’ na susito, iatu tau iatomai ladipakasiri’ sia la narampoi kamatakuran kapua (ayat 6). Na iatu to umpatongan tu Puang Matua la unnappa’ kamakarimmanan sia pa’tunduan diomai Puang Matua (ayat 7).
Iamoto la tontongki’ melada’ diona Puang Matua, anta akuI sia ta pangke’I ondong ta penombai.Da’ta mendadi to baga ba’tu to tang kinaa sangadinna la tontong ta bungka’ tu penaanta dio olona sia tae’ tapengkullei untaloi tu kamoraian kale anta pemeloi tu mintu’ katuoanta dio oloNa. La mendadiki’ ia to sa’bi diona kamamasean tang lelukNa Puang Matua. Amin.
