RENUNGAN HARIAN TORAYA (REHAT)
Senin, 11 Agustus 2025
BELANNA KAPATONGANAN
(Karena Iman)
Ibrani 11:1-8
Mintu' penggauran sia kedona to lino den nasang passabaranna lan penaa sia tangnga'. Den nasang banning sieranna bu'tu lu lanmai penaa. Den tu tang tama bang tangnga'. Tama bangsia tangnga' ke den to sugi' untaa-taa barang apanna, apa tae'o na lambi' tangnga'ta ke den datu untampe isunganna belanna malaku tu to buda kumu ana diben padang la nani undaka' kande. lanna tangnga' tolinota, butung to tae'bang la mosorokna tama timbanganta ke dikua melomo tu katuoanta dio misa' tondok ta la male untampei. La nasangaki' tau to katamataman ke ditibei tu la'bo' ta lao undaka' piso la dilelengan kayu.
Melo sia sundun melona katuoanna Abraham dio tondokna, anna male untampei. Misa'mora tu tae' dio kalena, iamo tu bati'. Apara bannang sieranna, anna titengka bate lentekna untampe tondokna, male umpempatui tondok tang manassapa? Maleso tu ianna to diulelean lan sura' Kadadian. Disa'bu' lan te sura' lbrani tu ma'una'na lan ba'tengna Abraham, to kumua belanna kapatonganan. (ay 8). Lendu' tongan memangnganna tu kapatonganan. Kapatangongan tu dipolalan untiroi lan kamanapparan tu a'gan tang nakita mata tolinota sia tang nalambi' tangnga'ta. Kapatongan tu mendadi matanta untiroi tu kadipadadian langi, lino sia mintu' angge maritik (ay. 3). Kapatonganan tu napobannang Habel umpemalaranni tu melona sia
nakala' penaan-Na Puang (ay. 4).
Nabenki' puang tu tangnga' kumua anta issanni ungkamali' Puang (Mat. 22:37). Dadi, la tapake tu tangnga' lan kapatonganan, dikua anna mintu'-mintu'na lan te katuoan dipomaupa' sia napomala'bi' Puang. Melo sia diporongko' ke mintu'na belanna kapatongan. Belanna kapatonganan, anna diparri-parri tu mengkarang. Belanna kapatonganan anna dipogau' tu kapemalaran. Belanna kapatonganan anta tontong umpeagi kasaenNa sule Puang Yesu, moi anna tang tama tangnga'. Nakua kadanna Paus Yohanes Paulus II, "aku percaya supaya aku mengerti." Inang manassa, iatu kapatonganan undaoanni mintu' kapaissanan sia pa'tangngaran. latu to ma'patongan umpogau' apa memangngan, Amin.
Sumber : Buku Renungan Harian Toraya (REHAT)
Diterbitkan oleh Badan Pekerja Sinode (BPS) Gereja Toraja.
